சிகரெட் வெடித்ததில் 6 பற்கள் உடைந்தன..!!

இந்தோனேசியாவில் திடீரென சிகரெட் வெடித்ததில் அதைப் புகைத்தவரின் 6 பற்கள் உடைந்து ரத்தம் கொட்டியது. வாயில் 51 தையல்கள் போடப்பட்டன.
இந்தோனேசிய தலைநகர் ஜகார்தா புறநகரான பெகாசியில் வசிப்பவர் ஆன்டே சுசான்டோ. வயது 31. சிகரெட் புகைத்தபடி பைக்கில் இவர் சென்று கொண்டிருந்தார். அப்போது திடீரென சிகரெட் பயங்கர சத்தத்துடன் வெடித்துச் சிதறியது.
அதில் ஆன்டேவின் வாயில் படுகாயம் ஏற்பட்டு 6 பற்கள் உடைந்தன. வாய்க்குள் சதை கிழிந்து ரத்தம் கொட்டியது. உடனடியாக அவர் மருத்துவமனையில் சேர்க்கப்பட்டார். அங்கு ஆன்டேவுக்கு வாயில் 51 தையல்கள் போடப்பட்டன.
இதுபற்றி அவர் கூறுகையில், ‘‘எனது பள்ளிப் பருவத்தில் இருந்து புகைத்து வந்தேன். இதுவரை இப்படி ஆனதில்லை. சிகரெட் வெடிக்கும் என எதிர்பார்க்க வில்லை. அந்த அதிர்ச்சியால் இனி புகைப்பதை நிறுத்த முயற்சி செய்வேன்’’ என்றார்.
சிகரெட் வெடித்து படுகாயம் ஏற்படுத்தியதால் அதைத் தயாரித்த நோஜோரனோ புகையிலை நிறுவனம் மீது இழப்பீடு கேட்டு வழக்கு தொடர ஆன்டேவின் குடும்பத்தினர் திட்டமிட்டுள்ளனர். இதுபற்றி அந்நிறுவன தரப்பில் கூறுகையில், ‘‘எங்கள் சிகரெட்டில் வெடிபொருள் ஏதும் கிடையாது. தவறுதலாக சேர்ந்திருக்கவும் வாய்ப்பில்லை’’ என்றனர்.